ضيقة الخاطر والحيا المرمادة ....امحمد قنانه الزيداني

ضيقة الخاطر والحيا المرمادة                             تشيب صغير السن قبل انداده

والحيا المنذمّة                                                      تشغشب علي بنادم تنـزّح دمه

القل يغبي زول كان مسمّى                             والمال يشهر ناس ما هم سادة

بلا مال ما تقدر شروط الهمة                           وتجواد ما تظهر عليك جوادة

والحيا المذمومة                                                    تشغشب علي بنادم تطيّر نومه

بلا مال بو جلجل يولّي بومة                           وبالمال بو حوّام فات العادة

ناش الحباري قبل طير الحومة                           والصقر حايس في المعاش وكاده

والحيا المعفونة                                                     تشغشب علي بنادم وتقلب لونه

كثير الدراهم والعمش في عيونه                        يشحوه لا كانّه غزال حمادة

وانا مريض وضحكتي مشنونة                          مريض قلب ما نيشي مريض وسادة

والحيا المعطوبة                                                    تشغشب علي بنادم وتقطع صوبه

بلا مال تبدا حالته منكوبة                              وبالمال يبدا عزم فوت انداده

بلا مال تبدا عيطته منبوبة                               وفيه السوايا كايدة العدادة

والحيا المرعوشة                                                   تخلي صغير السن راسه لوشة

والفقر لو ردن عليك جيوشه                           كريم ربنا يزق معاش عباده

ان كان الغني م العبد يغلق حوشه             اما باب ربي ما عليه مكادة

والحيا المغتصة                                                     تشغشب علي بنادم وتقلب نصه

اللي قوي ياخذ خيار الحصة                            واللي ضعيف من فقره عليه صمادة

واللي معاه العرف ما يتوصّى                           يدير كل شي بالقدر ع المعتادة

والصغا والهدة                                                     تشيب صغير السن قبل المدة

واللي عطاه الله ظاهر قده                               تعلّى علي الكرسي زها بقعاده

واللي عقب والفقر قاطع رده                           يفوت الصوايب غصب ما هي رادة

والصغا والغصرة                                        تسمع كلام الغيب فيه الجسرة

بلا مال ما عندك حبيب ونصرة                        يفرّج عليك الكرب بعد كساده

ولا ياخذك طول النهار وقصره                         يضوي ظلام الليل بعد سواده

والصغا لبنادم                                                     يخلّيه لونه شين رايه عادم

لا يصيد يكسب لا جمل لا خادم            ويبدا حديثه شين بين انداده

وكثير الدراهم كان جاهم زادم                        يقولوا حديثه زين فعله قاده

بالمال حتى الخايب                                       يجوا معاه جملتهم شباب وشايب

واما قليل المال قالوا سايب                              يمشي يكر الفحم للحدادة

والمولى علي جملة عبيدة نايب                           الحكم حكمه، والمراد مراده

ضيقة الخاطر ملت                                                عليّ حابسة منها القلوب اعتلّت

تناتيلها وقت الحجايج فلت                             علي ري ساعة يسهروا الجبّادة

والعين ما جاها طرب وانحلت                          وهي مغير تسكب دمعها بدادة

حالها شيّنّي                                                        ولا نيش عنها من قديم مونّي

اللي ظانه خفّف اثقاله عني                    استشوى تراب الهم زاد رشاده

يا ريت بويا من زمان دفنّي                             افتكّيت راني م الصغا وعناده

حالها متبيّن                                                        تخليك ديما بين خوتك هين

في الجمع لو يبقى حديثك ليّن                          تقول طيّبة ترجع عليك مكادة

وليا لهّموك الدين لا تدّيّن                               واسبق علي ربك وسيع بداده

واسبق علي ربك بحسب الطاعة              رزقك علي ربك بغير نزاعة

بالك تْتَبّع يا فهيم دناعة                                لو كان ما تكسب ولا ودادة

خليه صوتك يرفع بشفاعة                              واتبع عباد الصلح والزهّادة

...................سلم                              تفكر رقاد القبر وقت يظلّم

واسكت علي مولاك لا تتكلّم                          ورب القضا يصعب عليك عناده

وواجب عليك الفرض فيه تسلّم              واصبر علي العازات غصب ورادة