بلوق الميز
مجموعة قصائد قصيرة ....امحمد قنانه الزيداني
|
بنادم ليا خص ماله..
بنادم ليا خص ماله من ايده ... حياته زهيدة ... يرزم علي شيل حمله يكيده بنادم ليا خص ماله يهاود ... ويملا المزاود ... ويعمد طريق السبب ما يعاود بنادم مثيل الذهب في المراود ... ليا راد سيده ... بعد كسر ينصاغ صيغة جديدة |
أوقات
أوقات نبقى طارب وأوقات نبقى باللسان انحارب
واوقات حتى الراي عندي خارب وأوقات فرخ البوم ضدي ضده
أوقات فيا الحيلة وأوقات كيف الصيد في الحبيلة
وأوقات نبقى صقر بو كمبيلة وأوقات نبقى بين شده وفده
وأوقات حتى المر عندي باهي وأوقات حتى الحلو ما يتعدى
ليام كيف الريح
ليام كيف الريح في الدرجاحة مرة شقا الخاطر ومرة راحة
يقدعن ويميلن ويديرن حوايج ما عليك يخيلن
ويحطن حواهن ع القوي ويشيلن ويْخَلّن العالي في الوطى مطراحه
أوقات نخدم بيدي وأوقات يبقوا كاثرين عبيدي
واوقات عشر كباش يبقى عيدي وأوقات ما نكسب ولا صياح
الناس رقدت وانا بروحي واعي
من كثر ماهن قاسيات أوجاعي الناس رقدت وانا بروحي واعي
الناس رقدت وارتاحت وهمومهم بعد لرقاد انزاحت
وانا خاطري فيه الهموم اجتاحت نين دمعتي مسحتها بدراعي
الناس راقدين هنايا ونسيوا مشاكلهم مع التغطايا
وأنا بروحي ما ونيس معايا نجوم السما عديتهن بصباعي
الوذن صناتة الحس والعين تشبح بيانه
والقلب صندوق للدس وعلة بنادم لسانه
مافي النسا طيبة تخيل وما في الشتاء يوم دافي
والغربي ليا حركه غيم معاه ماتجد عوافي
عند الاشتراك في المدونة ، سنرسل لك بريدًا إلكترونيًا عند وجود تحديثات جديدة على الموقع حتى لا تفوتك.
نبذة عن الكاتب
By accepting you will be accessing a service provided by a third-party external to https://almaze.co.uk/
تعليقات