ما زال في غنداقه ....عبد السلام الحر

يزيد ما نقص ما زال في غنداقه       غلا من محوجب بالسود ارماقه

ما زال في معتاده                      مع طولة الميجال زاد زيادة

 

ناوض اخرى عاود جديد بياده          ونا كنت ناس غيته واقناقه

تهايا عزيز وهفنا ميعاده                تقول امس يا شاطن معاي اشواقه

وعاد م المواقي دمعتي بدادة            سيول يفلتن ليلة نجوم غراقى

مهاياة بو سالف غلب كداده             خفت اثقال العقل راج وثاقه

وما زال كيف سعتّا                    غلا من معانا شاطية غيتّا

حزام الخماس اللي مع قفزتّا            تجيب الطوارف والحثي دقداقة

تفك النهيبة وين ما لحقتّا               تجيب الفخر يوماً يصير ملاقى

نهار العياط تفوج بعنايتّا                تجود وين ما تمّن الخيل شراقى

ركوبة ولد نين الحلاط يحته            وهو في المقابل ضربته عوّاقة

ان قابل القوم تعود بخسارتّا             سوا منفرد والا معاه رفاقة

مسلح بحربي للقتال موتّى              يرزي طليبه وين ناظ لحاقه

مرافق الخويلة عاش في جرتّا           ان صار خوف ما يطلق خشوم نياقه

وكان اجدبت شور العفا يلفتّا            تعيش وين مو هامل رقيق ساقه

ما زلت فيه نحازي                     غلا عيون رتاع البساط الجازي

حزام من مع لذع الركات تجازي        ياسه طويل، ولوعته حراقة

عزاز ياسهم ما زلت فيه نحازي         كيف المرار المر وان مذاقه

حتى وهو غني بالغير بو غمّازي        بين الخضورة والسواد زواقه

غلاها وطن في الجوف مو متوازي     داير شوارع ضابحات اسواقه

ان لبست رفيع السوم من بنغازي       حصيري وبو ثومة شقي دقاقه

وجت ترتشاق ومشيها طربازي         عناق ريم ضايقها زفي بنداقة

ما زال حبه صافي                      كيف قبل لباس القناع الوافي

وما زال مطّاول عليه ريافي            كبير فاهقه ما جت عليه غلاقة

وما زلت لا توّا عليه نفافي             عيون من يرابي الصيد وان اطلاقه

معاي نارها توقد بيان وخافي           ولا سريب غنواها قطع عيلاقة

منين رادعت فوق العريض رعافي     حاكم لفى يربي رطين ابواقه

شرار خدها فوقه غثيث مسافي          نزيل غيم ف اركانه ضوت براقة

وشلة غوايشّا مع الرفراقي              تقلع فواد الجوف من معلاقه

قطا من برور بعاد روّح لافي           ضمايا مع سكرة وميد ازّاقى

ما زال في تياره                         يزيد ما نقص يرقن لهايب ناره

غلا بو حداجة كاشية جرجاره           يجدد مع ياسه وطول فراقه

ذاريت واجد نحسبه يذارى              اجّوشن معاي ودار لي سرّاقة

وبقيت كيف من خاسر أموال تجارة     فقد الغوالي مر ما يتّاقى

وما زال مرّث فينا                      غلا بو نقاطي قارنات جبينه

جروحه كبار مخلفات دفينة              تناوض مع ميجال حول فراقه

داير لنا مشغال ومخلينا                  نراجو مراجاة اليسير اطلاقه

عيون من يبوّع فيد قناصينه             جاسر يملش في سيور سباقه

وهو ما فضي طول الزمان رهينة       وطال الرجا فيه ونقص ميثاقه

ونا بقيت من حوزة غلاه جرينة          ياسه مع موح الديار تلاقى

ما زلت في قصقاله                      نريد نتركه يرقى معاي ضلاله

سفّاي الحداجة لاورا عنقالة              عيون من جزا ف اوهام بير حراقة

وراه خاطري خفن جميع اثقاله           وشال نين ما سيب ولا خماقة

المصدر : مكتبة التراث الشعبي